Maine duniya ki har cheez se talaaq le liya—
is ke banavati pan se, iske dikhave se,
iske matlabi hone se, iske ghamand se,
aur iske jealousy se.

Itni saari kamiyan hain logon mein…
woh sab dekhte bhi hain, samajhte bhi hain,
phir bhi hone dete hain.
Apne karmon ko koi nahi dekhta.
Yeh bhi nahi sochte ki in sab ka anjaam kya hoga.

Kuch log hote hain jo har haal mein
apne karm sahi rakhna chahte hain.
Par duniya unhe pagal, bewakoof kehti hai,
unka mazaak banati hai,
unki feelings ko masal kar
apna kaam nikal leti hai.

Aur phir sawal yeh aata hai—
aur kitna tootna hai is sab mein?
Kab tak yeh ummeed rahegi
ki ek din duniya samjhegi,
hamari keemat pehchaanegi?

Sach yeh hai—
duniya na samajhna chahti hai,
na rukna chahti hai.

Pata nahi kab yeh ummeed chhootegi,
kab main jeena seekh paungi
bina har baat dil par liye.

Kab tak main dusron ki baaton mein
roz thoda-thoda marungi?

Kabhi-kabhi sab bahut mushkil lagta hai.
Kadwahat bahar aaye to karm toot jaate hain,
aur andar rahe to woh hi humein tod deti hai.

Mere karm bhi kabhi-kabhi hil jaate hain…
Main koshish karti hoon apni soch aur apne karm saaf rakhne ki,
par har baar jeet nahi paati.

Sabse alag hone ki koshish karke bhi,
main poori tarah alag nahi ho paati.