Aaj meri pehli salary account mein aayi. Shayad meri zindagi ke un khaas palon mein se ek, jise main shabdon mein poori tarah bayan nahi kar sakti. Jab mobile par salary credit ka message dekha, to pehli baar mehsoos hua ki education aur mehnat ki asli keemat kya hoti hai. Samajh aaya ki paise kamana kitna mushkil hai aur isi liye unki importance kitni zyada hoti hai.
Salary aate hi maine socha ki online transfer ya card se kaam nahi chalega. Mujhe apni pehli salary ko haath mein mehsoos karna tha. Isliye main seedha bank pahunch gayi. Government bank tha, lambi line thi, bahut saari formalities thi aur waiting time bhi kaafi zyada tha. Lekin us din na mujhe garmi ki parwah thi, na intezar ki. Dil mein bas ek hi khushi thi ki aaj meri mehnat ka pehla phal milne wala hai.
Jab paise haath mein aaye, to unhe dekhkar ek alag hi ehsaas hua. Ghar pahunchte hi maine woh saare paise mummy-papa ke haath mein rakh diye aur kaha, "Yeh aapke paise hain, aap jaisa chahein inhe use kariye."
Us pal mummy-papa ke chehre par jo garv aur khushi thi, use dekhkar meri aankhen bhar aayi. Mujhe laga jaise meri salary ki asli keemat un noton mein nahi, balki unki muskurahat mein thi. Pehli baar mehsoos hua ki kamane ki khushi sirf apne liye nahi hoti, balki un logon ke liye bhi hoti hai jinhone humein is mukaam tak pahunchane ke liye apni poori zindagi laga di.
Aaj bhi meri pehli salary ki yaad aati hai, to paise yaad nahi aate... mummy-papa ki aankhon mein dikhta woh garv yaad aata hai। ❤️