Hello Friends… Hope you all are doing good.
Aaj main baat karne wali hoon apni **self-discovery** ke baare mein.
Aajkal ke bachchon ke paas explore karne ke liye bahut kuch hai. Unke paas itne options hain ki woh dekh-parakh sakte hain ki future mein unhe kya banna hai, kya achieve karna hai aur kis direction mein jaana hai.
Lekin mere time par aisa nahi tha.
Mujhe khud nahi pata tha ki mujhe kya banna hai. Bas teacher banne ka shauk tha, toh laga shayad mujhe teacher hi banna chahiye. Koshish bhi ki… lekin aakhir mein maine woh decision chhodne ka le liya.
Uske baad maine alag-alag tarah ki jobs bhi ki, lekin main kisi mein properly survive nahi kar paayi.
Aur shayad sabse badi problem ye thi ki main **khud par yakin hi nahi karti thi.**
Log mere baare mein jo bhi baatein karte, main unhe sun leti thi aur wahi sach maan leti thi.
Mujhe lagta tha ki doosre log mujhse zyada samajhdar hain. Isliye woh jo bhi keh rahe hain, wahi sahi hoga… aur shayad meri soch hi galat hai.
Khud ki baat par kabhi poora bharosa nahi tha.
Isi uljhan mein maine kuch galat decisions bhi liye.
Lekin zindagi sirf galtiyan nahi karwati… **woh un galtiyon se seekhne ka mauka bhi deti hai.**
Dheere-dheere zindagi ne mujhe bahut se sabak sikhaye.
Aur ek din mujhe ye samajh aaya ki…
**Doosron ki kahi har baat sahi nahi hoti, aur meri har baat galat bhi nahi hoti.**
Bas yahin se shayad meri real self-discovery shuru hui.
Maine dheere-dheere apni baaton ko bhi importance dena shuru kiya.
Apne decisions ke liye har kisi ko convince karna chhod diya.
Maine ye samajhna shuru kiya ki agar main apne decisions ki zimmedari khud le rahi hoon, toh har decision ke liye mujhe sabki approval ki zaroorat nahi hai.
Aur interesting baat ye hai ki jab maine khud ko seriously lena shuru kiya, toh log bhi dheere-dheere meri position samajhne lage.
Woh bhi usi hisaab se adjust hone lage, jis tarah maine unke saath apni boundaries aur apna behaviour set kiya.
Aaj bhi main professionally shayad kuch bahut bada nahi hoon.
Lekin as a person…
**Maine khud mein bahut growth dekhi hai.**
Aaj main apni baat sun sakti hoon.
Apne decisions par bharosa kar sakti hoon.
Aur sabse important…
**Mujhe har baar khud ko sahi saabit karne ki zaroorat mehsoos nahi hoti.**
Shayad mere liye…
**yahi meri achievement hai.**
Aur shayad self-discovery ka matlab bhi yahi hai—
ki ek din aapko duniya se zyada nahi,
**khud se milna zaroori lagne lage.**